Birt 29.10.2026

Þrír forsetar úr röðum Flokkahóps miðjumanna taka við forystu á Norðurlöndum

Lars-Christian Brask frá Danmörku hefur nú verið kjörinn forseti Norðurlandaráðs. Justus Hansen frá Grænlandi og Sunnvá Dahl Høgfeldt frá Færeyjum munu skipta með sér embætti varaforseta. Öll þrjú tilheyra þau Flokkahópi miðjumanna.

Árið 2027 fer Danmörk með formennsku í Norðurlandaráði. En ekki aðeins Danmörk. Danska sendinefndin hefur ákveðið að forsetaembætti Norðurlandaráðs verði sameiginlegt verkefni Danmerkur, Grænlands og Færeyja. Lars-Christian Brask var í dag kjörinn forseti Norðurlandaráðs og þakkaði þinginu fyrir traustið.

– Danmörk, Færeyjar og Grænland fara saman með forsetaembættið. Þetta er mikilvægt og sögulegt samstarf og ólík reynsla okkar og sjónarmið gera embættið sterkara. Ég hlakka mjög til samstarfsins við Sunnvá Dahl Høgfeldt frá Færeyjum og Justus Hansen frá Grænlandi.

Lars-Christian Brask tilheyrir Flokkahópi miðjumanna og það gera Hansen og Høgfeldt einnig. Þau skipta með sér embætti varaforseta. Fyrri helming ársins gegnir Justus Hansen embættinu.

– Ég mun leggja mig allan fram um að vera eins góður varaforseti og mögulegt er. Ég þakka Danmörku fyrir þetta tækifæri. Sú staðreynd að Danmörk vill deila forsetaembættinu með Færeyjum og Grænlandi sýnir að samstarf okkar byggist á jafnrétti.

Síðari hluta ársins 2027 verður Sunnvá Dahl Høgfeldt varaforseti. Hún notaði einnig tækifærið til að þakka þinginu fyrir traustið.

– Ég hlakka til að taka við þessu verkefni ásamt Lars-Christian Brask og Justus Hansen. Í Færeyjum segjum við gjarnan: „Það er ekkert vont veður, aðeins slæmur klæðnaður.“ Sjáum því til þess að Norðurlönd séu vel búin fyrir framtíðina.

Á myndinni: Ný forysta Norðurlandaráðs: Sunnvá Dahl Høgfeldt, Lars-Christian Brask og Justus Hansen. Ljósmynd: Magnus Fröderberg/Norden.org.